辭職的離開理由 真的重要嗎?

「老細，我想辭職。」
「點解？入我房坐底傾傾。」

在職場總算茍且生存了一段日子，員工辭職的五花八門原因基本上都聽過，主要離不開以下幾樣：要求加人工同升職、需要更多私人時間、想轉換新工作環境、打算讀書進修等。當然以上都是員工辭職時對外官腔答案，總不會道出心底話「我覺得老細無料到」或者「我認為公司好無前途」吧。

而芸芸眾多辭職理由都總會有別開生面、天馬行空，最令我印象深刻是當年第一份工認識的IT部 Gary，Gary就較沉默寡言，就算平時食lunch都自己一個。由於工作關係我跟Gary接觸算較多，亦可能這個原因，Gary準備辭職時第一個竟然是問我意見。而IT部阿頭出名數口精最叻留人，以Gary口才可以話打定輸數，幾經思索後Gary決定用「屋企人識睇風水，如果我繼續做會有生命危險」為由辭職。畢竟性命攸關，對方聽完後都拿拿臨放生Gary。

其實提出辭職同提出分手一樣，有人原意是作為手段達到目的，例如想加人工或催迫對方結婚；亦有人是出自真心想離開。如果屬於後者，其實再繼續追問離開原因都沒多大意思。無他，只要心水夠清肯面對現實，離開原因都不外乎當事人已經有更好選擇，再冠冕堂皇的原因都只是掩飾的門面功夫，知道真相就只會令你更傷心。當逝去的心既成事實，何必還糾結當中原因呢？